Cerddi Dafydd ap Gwilym

Dafydd ap Gwilym yw’r enwocaf a’r mwyaf gwreiddiol o feirdd Cymru’r Oesoedd Canol, ac fe’i hystyrir gan lawer fel bardd mwyaf Cymru erioed. Ei brif bynciau oedd serch a natur, ac mae ei gerddi’n cyfleu ymateb unigolyddol sy’n cyfuno hiwmor direidus a dwyster teimladwy. Roedd yn arloeswr barddol a estynnodd ffiniau’r iaith Gymraeg a chrefft cerdd dafod. Yn y gyfrol hon mae’r aralleiriadau mewn Cymraeg modern a’r nodiadau yn gymorth anhepgor i alluogi’r darllenydd i werthfawrogi barddoniaeth gyfoethog y testunau gwreiddiol.